ЧАСЫ И ИЗОБРАЗИТЕЛЬНЫ (ОБЕДНИЦА), читаемые в Лазареву субботу
ЧАС ТРЕТИЙ
Молитвами святых отец наших, Господи Иисусе Христе, Боже наш, помилуй нас. Аминь.
Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды). Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на Небесех! Да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искуше ние, но избави нас от лукаваго.
Господи, помилуй (12 раз). Слава Отцу и Сыну и Святому Духу, и ныне и присно и во веки веков. Аминь.
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу нашему.
Псалом 16
Услыши, Господи, правду мою, вонми молению моему, внуши молитву мою не во устнах льстивых.
От лица Твоего судьба моя изыдет, oчи мои да видита правоты. Искусил еси сердце мое, посетил еси нощию, искусил мя еси, и не обретеся во мне неправда. Яко да не возглаголют уста моя дел человеческих, за словеса устен Твоих аз сохраних пути жестоки. Соверши стопы моя во стезях Твоих, да не подвижутся стопы моя.
Аз воззвах, яко услышал мя еси, Боже, приклони ухо Твое мне и услыши глаголы моя. Удиви милости Твоя, спасаяй уповающия на Тя от противящихся деснице Твоей. Сохрани мя, Господи, яко зеницу oка; в крове крилу Твоeю покрыеши мя, от лица нечестивых острастших мя. Врази мои душу мою одержаша, тук свой затвориша, уста их глаголаша гордыню. Изгонящии мя ныне обыдоша мя, oчи свои возложиша уклонити на землю. Объяша мя яко лев готов на лов и яко скимен обитаяй в тайных. Воскресни, Господи, предвари я и запни им; избави душу мою от нечестиваго, oружие Твое от враг руки Твоея. Господи, от малых от земли, раздели я в животе их, и сокровенных Твоих исполнися чрево их. Насытишася сынов, и оставиша останки младенцeм своим. Аз же правдою явлюся лицу Твоему, насыщуся, внегда явити ми ся славе Твоей.
Псалом 24
К Тебе, Господи, воздвигох душу мою. Боже мой, на Тя уповах, да не постыжуся во век, ниже да посмеют ми ся врази мои. Ибо вси терпящии Тя не постыдятся. Да постыдятся беззаконнующии вотще. Пути Твоя, Господи, скажи ми, и стезям Твоим научи мя. Настави мя на истину Твою, и научи мя; яко Ты еси Бог Спас мой, и Тебе терпех весь день. Помяни щедроты Твоя, Господи, и милости Твоя, яко от века суть. Грех юности моея, и неведения моего не помяни; по милости Твоей помяни мя Ты, ради благости Твоея, Господи. Благ и прав Господь, сего ради законоположит согрешающим на пути. Наставит кроткия на суд, научит кроткия путем Своим. Вси путие Господни милость и истина, взыскающим завета Его, и свидения Его. Ради имене Твоего, Господи, и очисти грех мой, мног бо есть. Кто есть человек бояйся Господа? Законоположит ему на пути, егоже изволи. Душа его во благих водворится, и семя его наследит землю. Держава Господь боящихся Его, и завет Его явит им. Очи мои выну ко Господу, яко Той исторгнет от сети нозе мои. Призри на мя и помилуй мя, яко единород и нищ есмь аз. Скорби сердца моего умножишася, от нужд моих изведи мя. Виждь смирение мое, и труд мой, и остави вся грехи моя. Виждь враги моя, яко умножишася, и ненавидением неправедным возненавидеша мя. Сохрани душу мою, и избави мя, да не постыжуся, яко уповах на Тя. Незлобивии и правии прилепляхуся мне, яко потерпех Тя, Господи. Избави, Боже, Израиля от всех скорбей его.
Псалом 50
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебе Единому согреших, и лукавое пред Тобою сотворих, яко да оправдишися во словесех Твоих и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтарь Твой тельцы
Слава Отцу и Сыну и Святому Духу, и ныне и присно и во веки веков. Аминь. Аллилуия, аллилуия, аллилуия, слава Тебе, Боже (Трижды).
Господи, помилуй (Трижды).
Тропарь праздника, глас 1:
О́бщее воскресе́ние пре́жде Твоея́ Стра́сти уверя́я, из ме́ртвых воздви́гл еси́ Ла́заря, Христе́ Бо́же. Те́мже и мы, я́ко о́троцы побе́ды зна́мения нося́ще, Тебе́ победи́телю сме́рти вопие́м: оса́нна в вы́шних, благослове́н Гряды́й во и́мя Госпо́дне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородице, Ты еси лоза истинная, возрастившая нам Плод живота, Тебе молимся, молися, Владычице, со святыми апостолы, помиловати души наша.
Господь Бог благословен, благословен Господь день дне, поспешит нам Бог спасений наших; Бог наш, Бог спасати.
Святый Боже, Святый Крепкий, Святый Безсмертный, помилуй нас. (Трижды). Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на Небесех! Да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Кондак, глас 2
Всех ра́дость Христо́с, И́стина, Свет, Живо́т и ми́ра Воскресе́ние, су́щим на земли́ яви́ся Свое́ю бла́гостию, и бысть о́браз Воскресе́ния, всем подая́ Боже́ственное оставле́ние.
Господи, помилуй (40 раз).
Молитва святителя Василия Великого
Иже на всякое время, и на всякий час, на Небеси и на земли покланяемый и славимый, Христе Боже, долготерпеливе, многомилостиве, многоблагоутробне, Иже праведныя любяй, и грешныя милуяй, Иже вся зовый ко спасению обещания ради будущих благ, Сам, Господи, приими и наша в час сей молитвы, и исправи живот наш к заповедем Твоим, души наша освяти, телеса очисти, помышления исправи, мысли очисти, и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.
Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Молитва преподобного Мардария
Владыко Боже Отче Вседержителю, Господи Сыне Единородный Иисусе Христе, и Святый Ду́ше, едино Божество, едина сила, помилуй мя грешнаго, и имиже веси судьбами, спаси мя, недостойнаго раба Твоего; яко благословен еси во веки веков. Аминь.
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу нашему.
Псалом 53
Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии восташа на мя и крепцыи взыскаша душу мою, и не предложиша Бога пред собою. Се бо Бог помогает ми, и Господь Заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко благо. Яко от всякия печали избавил мя еси, и на враги моя воззре око мое.
Псалом 54
Внуши, Боже, молитву мою и не презри моления моего. Вонми ми и услыши мя; возскорбех печалию моею и смятохся от гласа вражия и от стужения грешнича. Яко уклониша на мя беззаконие и во гневе враждоваху ми. Сердце мое смятеся во мне и боязнь смерти нападе на мя. Страх и трепет прииде на мя и покры мя тьма. И рех: кто даст ми криле, яко голубине, и полещу, и почию? Се удалихся бегая и водворихся в пустыни. Чаях Бога, спасающаго мя от малодушия и от бури. Потопи, Господи, и раздели языки их, яко видех беззаконие и пререкание во граде. Днем и нощию обыдет и по стенам его; беззаконие и труд посреде его и неправда; и не оскуде от стогн его лихва и лесть. Яко аще бы враг поносил ми, претерпел бых убо; и аще бы ненавидяй мя на мя велеречевал, укрыл бых ся от него. Ты же, человече равнодушне, владыко мой и знаемый мой; иже купно наслаждался еси со мною брашен, в дому Божии ходихом единомышлением. Да приидет же смерть на ня, и да снидут во ад живи; яко лукавство в жилищах их, посреде их. Аз к Богу воззвах, и Господь услыша мя. Вечер и заутра, и полудне повем, и возвещу, и услышит глас мой. Избавит миром душу мою от приближающихся мне, яко во мнозе бяху со мною. Услышит Бог и смирит я, Сый прежде век. Несть бо им изменения, яко не убояшася Бога. Простре руку свою на воздаяние, оскверниша завет Его. Разделишася от гнева лица Его, и приближишася сердца их; умякнуша словеса их паче елея, и та суть стрелы. Возверзи на Господа печаль твою, и Той тя препитает, не даст в век молвы праведнику. Ты же, Боже, низведеши я в студенец истления; мужие кровей и льсти не преполовят дней своих. Аз же, Господи, уповаю на Тя.
Псалом 90
Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи, и от словесе мятежна. Плещма Своима осенит тя, и под криле Его надеешися; оружием обыдет тя истина Его, не убоишися от страха нощнаго, от стрелы летящия во дни, от вещи во тьме преходяшия, от сряща, и беса полуденнаго. Падет от страны Твоея тысяща, и тьма одесную Тебе, к Тебе же не приближится. Обаче очима Твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище Твое. Не приидет к Тебе зло, и рана не приближится телеси Твоему. Яко Ангелом Своим заповесть о Тебе, сохранити тя во всех путех твоих. На руках возмут тя, да не когда преткнеши о камень ногу твою. На аспида и василиска наступиши, и попереши льва и змия. Яко на Мя упова, и избавлю и; покрыю и, яко позна имя Мое. Воззовет ко Мне, и услышу его; с ним есмь в скорби, изму его, и прославлю его, долготою дний исполню его, и явлю ему спасение Мое.
Слава Отцу и Сыну и Святому Духу, и ныне и присно и во веки веков. Аминь. Аллилуия, аллилуия, аллилуия, слава Тебе, Боже (Трижды).
Господи, помилуй (Трижды).
Тропарь праздника, глас 1:
О́бщее воскресе́ние пре́жде Твоея́ Стра́сти уверя́я, из ме́ртвых воздви́гл еси́ Ла́заря, Христе́ Бо́же. Те́мже и мы, я́ко о́троцы побе́ды зна́мения нося́ще, Тебе́ победи́телю сме́рти вопие́м: оса́нна в вы́шних, благослове́н Гряды́й во и́мя Госпо́дне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Яко не имамы дерзновения за премногия грехи наша, Ты иже от Тебе рождшагося моли, Богородице Дево: много бо может моление матернее ко благосердию Владыки; не презри грешных мольбы, Всечистая, яко Милостив есть, и спасти могий, иже и страдати о нас изволивый.
Скоро да предварят ны щедроты Твоя, Господи, яко обнищахом зело; помози нам, Боже Спасе наш, славы ради имене Твоего, Господи, избави нас, и очисти грехи наша, имене ради Твоего.
Святый Боже, Святый Крепкий, Святый Безсмертный, помилуй нас. (Трижды). Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на Небесех! Да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Кондак, глас 2
Всех ра́дость Христо́с, И́стина, Свет, Живо́т и ми́ра Воскресе́ние, су́щим на земли́ яви́ся Свое́ю бла́гостию, и бысть о́браз Воскресе́ния, всем подая́ Боже́ственное оставле́ние.
Господи, помилуй (40 раз).
Молитва святителя Василия Великого
Иже на всякое время, и на всякий час, на Небеси и на земли покланяемый и славимый, Христе Боже, долготерпеливе, многомилостиве, многоблагоутробне, Иже праведныя любяй, и грешныя милуяй, Иже вся зовый ко спасению обещания ради будущих благ, Сам, Господи, приими и наша в час сей молитвы, и исправи живот наш к заповедем Твоим, души наша освяти, телеса очисти, помышления исправи, мысли очисти, и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.
Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Молитва святителя Василия Великого
Боже и Господи сил, и всея твари Содетелю, иже за милосердие безприкладныя милости Твоея Единороднаго Сына Твоего, Господа нашего Иисуса Христа, низпославый на спасение рода нашего, и честным Его Крестом рукописание грех наших растерзавый, и победивый тем начала и власти тьмы; Сам, Владыко Человеколюбче, приими и нас грешных благодарственная сия и молебныя молитвы, и избави нас от всякаго всегубительнаго и мрачнаго прегрешения, и всех озлобити нас ищущих, видимых и невидимых враг. Пригвозди страху Твоему плоти наша, и не уклони сердец наших в словеса или помышления лукавствия; но любовию Твоею уязви души наша, да к Тебе всегда взирающе, и еже от Тебе светом наставляеми, Тебе неприступнаго и присносущнаго зряще света, непрестанное Тебе исповедание и благодарение возсылаем, Безначальному Отцу со Единородным Твоим Сыном, и Всесвятым, и Благим, и Животворящим Твоим духом, ныне и присно и во веки веков. Аминь.
ЧАС ДЕВЯТЫЙ
Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Цареви и Богу нашему.
Псалом 83
Коль возлюбленна селения Твоя, Господи сил! Желает и скончавается душа моя во дворы Господни; сердце мое и плоть моя возрадовастася о Бозе Живе. Ибо птица обрете себе храмину, и горлица гнездо себе, идеже положит птенцы своя; олтари Твоя, Господи сил, Царю мой и Боже мой. Блажени живущии в дому Твоем, в веки веков восхвалят Тя. Блажен муж, емуже есть заступление его у Тебе, восхождения в сердцы своем положи. Во юдоль плачевную, в место еже положи, ибо благословение даст законополагаяй. Пойдут от силы в силу: явится Бог богов в Сионе. Господи Боже сил, услыши молитву мою, внуши, Боже Иаковль. Защитниче наш, виждь, Боже, и призри на лице Христа Твоего. Яко лучше день един во дворех Твоих паче тысящ; изволих приметатися в дому Бога моего паче, неже жити ми в селениих грешничих. Яко милость и истину любит Господь, Бог благодать и славу даст, Господь не лишит благих ходящих незлобием. Господи Боже сил, блажен человек уповаяй на Тя.
Псалом 84
Благоволил еси, Господи, землю Твою, возвратил еси плен Иаковль. Оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны, или простреши гнев Твой от рода в род? Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающия сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсия, и правда с небесе приниче. Ибо Господь даст благость, и земля наша даст плод свой. Правда пред Ним предыдет, и положит в путь стопы своя.
Псалом 85
Приклони, Господи, ухо Твое, и услыши мя, яко нищ и убог есмь аз. Сохрани душу мою, яко преподобен есмь: спаси раба Твоего, Боже мой, уповающаго на Тя. Помилуй мя, Господи, яко к Тебе воззову весь день. Возвесели душу раба Твоего, яко к Тебе взях душу мою. Яко Ты, Господи, благ и кроток, и многомилостив всем призывающим Тя. Внуши, Господи, молитву мою, и вонми гласу моления моего. В день скорби моея воззвах к Тебе, яко услышал мя еси. Несть подобен Тебе в бозех, Господи, и несть по делом Твоим. Вси языцы, елики сотворил еси, приидут и поклонятся пред Тобою, Господи, и прославят имя Твое, яко велий еси Ты, и творяй чудеса, Ты еси Бог един. Настави мя, Господи, на путь Твой, и пойду во истине Твоей: да возвеселится сердце мое боятися имене Твоего. Исповемся Тебе, Господи Боже мой, всем сердцем моим, и прославлю имя Твое в век, яко милость Твоя велия на мне, и избавил еси душу мою от ада преисподнейшаго. Боже, законопреступницы восташа на мя, и сонм державных взыскаша душу мою, и не предложиша Тебе пред собою. И Ты, Господи Боже мой, щедрый и милостивый, долготерпеливый, и многомилостивый и истинный, призри на мя и помилуй мя, даждь державу Твою отроку Твоему, и спаси сына рабы Твоея. Сотвори со мною знамение во благо, и да видят ненавидящии мя, и постыдятся, яко Ты, Господи, помогл ми и утешил мя еси
Слава Отцу и Сыну и Святому Духу, и ныне и присно и во веки веков. Аминь. Аллилуия, аллилуия, аллилуия, слава Тебе, Боже (Трижды).
Господи, помилуй (Трижды).
Тропарь праздника, глас 1:
О́бщее воскресе́ние пре́жде Твоея́ Стра́сти уверя́я, из ме́ртвых воздви́гл еси́ Ла́заря, Христе́ Бо́же. Те́мже и мы, я́ко о́троцы побе́ды зна́мения нося́ще, Тебе́ победи́телю сме́рти вопие́м: оса́нна в вы́шних, благослове́н Гряды́й во и́мя Госпо́дне.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Иже нас ради рождейся от Девы, и распятие претерпев, Благий, испровергий смертию смерть, и воскресение явлей яко Бог, не презри, яже создал еси рукою Твоею; яви человеколюбие Твое, Милостиве, приими рождшую Тя, Богородицу, молящуюся за ны, и спаси, Спасе наш, люди отчаянныя.
Не предаждь нас до конца, имене Твоего ради, и не разори завета Твоего, и не отстави милости Твоея от нас, Авраама ради возлюбленнаго от Тебе, и за Исаака, раба Твоего, и Израиля святаго Твоего.
Святый Боже, Святый Крепкий, Святый Безсмертный, помилуй нас. (Трижды). Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на Небесех! Да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Кондак, глас 2
Всех ра́дость Христо́с, И́стина, Свет, Живо́т и ми́ра Воскресе́ние, су́щим на земли́ яви́ся Свое́ю бла́гостию, и бысть о́браз Воскресе́ния, всем подая́ Боже́ственное оставле́ние.
Господи, помилуй (40 раз).
Молитва святителя Василия Великого
Иже на всякое время, и на всякий час, на Небеси и на земли покланяемый и славимый, Христе Боже, долготерпеливе, многомилостиве, многоблагоутробне, Иже праведныя любяй, и грешныя милуяй, Иже вся зовый ко спасению обещания ради будущих благ, Сам, Господи, приими и наша в час сей молитвы, и исправи живот наш к заповедем Твоим, души наша освяти, телеса очисти, помышления исправи, мысли очисти, и избави нас от всякия скорби, зол и болезней, огради нас святыми Твоими Ангелы, да ополчением их соблюдаеми и наставляеми, достигнем в соединение веры и в разум неприступныя Твоея славы, яко благословен еси во веки веков, аминь.
Господи, помилуй (Трижды). Слава Отцу и Сыну и Святому Духу, и ныне и присно и во веки веков. Аминь.
Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Молитва святителя Василия Великого
Владыко Господи Иисусе Христе Боже наш, долготерпевый о наших согрешениих, и даже до нынешняго часа приведый нас, воньже на Животворящем Древе вися, благоразумному разбойнику иже в рай путесотворил еси вход, и смертию смерть разрушил еси, очисти нас грешных и недостойных раб Твоих. Согрешихом бо и беззаконновахом, и несмы достойни возвести очеса наша и воззрети на высоту небесную, зане оставихом путь правды Твоея, и ходихом в волях сердец наших. Но молим Твою безмерную благость, пощади нас, Господи, по множеству милости Твоея, и спаси нас имене Твоего ради Святаго, яко исчезоша в суете дние наша, изми нас из руки сопротивнаго, и остави нам грехи наша, и умертви плотское наше мудрование, да ветхаго отложивше человека, в новаго облецемся; и Тебе поживем, нашему Владыце и Благодетелю, и тако Твоим последующе повелением, в вечный покой достигнем, идеже есть всех веселящихся Жилище, Ты бо еси воистинну истинное веселие и радость любящих Тя, Христе Боже наш, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно и во веки веков. Аминь.
ИЗОБРАЗИТЕЛЬНЫ
Псалом 102
Благослови, душе моя, Господа, и вся внутренняя моя имя святое Его; благослови, душе моя, Господа, и не забывай всех воздаяний Его, очищающаго вся беззакония твоя, изцеляющаго вся недуги твоя, избавляющаго от истления живот твой, венчающаго тя милостию и щедротами, исполняющаго во благих желание твое: обновится яко орля юность твоя. Творяй милостыни Господь и судьбу всем обидимым. Сказа пути Своя Моисеови, сыновом Израилевым хотения Своя. Щедр и милостив Господь, долготерпелив и многомилостив. Не до конца прогневается, ниже во век враждует: не по беззаконием нашим сотворил есть нам, ниже по грехом нашим воздал есть нам. Яко по высоте небесней от земли, утвердил есть Господь милость Свою на боящихся Его: елико отстоят востоцы от запад, удалил есть от нас беззакония наша. Якоже щедрит отец сыны, ущедри Господь боящихся Его. Яко той позна создание наше, помяну, яко персть есмы. Человек, яко трава дние его, яко цвет сельный, тако оцветет; яко дух пройде в нем, и не будет, и не познает ктому места своего. Милость же Господня от века и до века на боящихся Его, и правда Его на сынех сынов, хранящих завет Его и помнящих заповеди Его творити я. Господь на Небеси уготова Престол Свой, и Царство Его всеми обладает. Благословите Господа вси Ангели Его, сильнии крепостию, творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычествия Его, благослови, душе моя, Господа.
Слава Отцу и Сыну и Святому Духу.
Псалом 145
Хвали, душе моя, Господа. Восхвалю Господа в животе моем, пою Богу моему, дондеже есмь. Не надейтеся на князи, на сыны человеческия, в нихже несть спасения. Изыдет дух его и возвратится в землю свою; в той день погибнут вся помышления его. Блажен, емуже Бог Иаковль Помощник его, упование его на Господа Бога своего, сотворшаго небо и землю, море и вся, яже в них; хранящаго истину в век, творящаго суд обидимым, дающаго пищу алчущим. Господь решит окованныя, Господь умудряет слепцы; Господь возводит низверженныя, Господь любит праведники. Господь хранит пришельцы, сира и вдову приимет и путь грешных погубит. Воцарится Господь во век, Бог твой, Сионе, в род и род.
И ныне и присно и во веки веков. Аминь.
Песнь Господу Иисусу Христу
Единородный Сыне, и Слове Божий, безсмертен Сый и изволивый спасения нашего ради воплотитися от святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, Един сый Святыя Троицы, спрославляемый Отцу и Святому Духу, спаси нас.
Блаженны
Во Царствии Твоем помяни нас, Господи, егда приидеши во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Ты еси́ утвержде́ние притека́ющих к Тебе́, Го́споди, Ты еси́ свет омраче́нных, и пое́т Тя дух мой.
Блажени милостивии, яко тии помилованы будут.
Два предлага́я де́йства Твоя́, показа́л еси́ суще́ств, Спа́се, сугу́бство: Бог бо еси́ и Челове́к.
Блажени чистии сердцем, яко тии Бога узрят.
Бе́здна сый ра́зума, Ты вопроша́еши: где положи́ся ме́ртвый; хотя́ воскреси́ти, Животода́вче, лежа́щаго.
Блажени миротворцы, яко тии сынове Божии нарекутся.
Ме́ста преходя́й, я́ко быв Челове́к, яви́лся еси́ опи́сан, исполня́я вся́ческая, я́ко Бог неопи́санный.
Блажени изгнани правды ради, яко тех есть Царство Небесное.
Ла́заря воздви́гл еси́ Боже́ственным, Христе́, глаго́лом, и мене́ мно́гими прегреше́ньми уме́рша возста́ви, молю́ся.
Блажени есте, егда поносят вам, и изженут, и рекут всяк зол глагол на вы, лжуще Мене ради.
Любо́вь Тебе́ в Вифа́нию, Го́споди, отведе́ к Ла́зарю, и сего́ уже́ смердя́ща воскреси́л еси́ я́ко Бог, и от уз а́довых спасл еси́.
Радуйтеся и веселитеся, яко мзда ваша многа на Небесех.
Ма́рфа у́бо отча́яшеся Ла́заря, я́ко ви́де четверодне́вна, Христо́с же истле́вшаго воскреси́ я́ко Бог, и к жи́зни преста́ви глаго́лом.
Слава Отцу и Сыну и Святому Духу. Бог сый и́стинный, Ла́зарево ве́дал еси́ успе́ние, и сие́ ученико́м Твои́м провозвести́л еси́, уверя́я, Влады́ко, Божества́ Своего́ неопреде́льное де́йство.
И ныне и присно и во веки веков. Аминь. Пло́тию опи́сан сый Неопи́санный, в Вифа́нию прише́д, я́ко Челове́к Влады́ко слези́ши над Ла́зарем, я́ко Бог же хотя́ воскреша́еши четверодне́внаго.
Тропарь праздника, глас 1:
О́бщее воскресе́ние пре́жде Твоея́ Стра́сти уверя́я, из ме́ртвых воздви́гл еси́ Ла́заря, Христе́ Бо́же. Те́мже и мы, я́ко о́троцы побе́ды зна́мения нося́ще, Тебе́ победи́телю сме́рти вопие́м: оса́нна в вы́шних, благослове́н Гряды́й во и́мя Госпо́дне.
Вместо Трисвятого
Елицы во Христа крестистеся, во Христа облекостеся, аллилуия.
Елицы во Христа крестистеся, во Христа облекостеся, аллилуия.
Елицы во Христа крестистеся, во Христа облекостеся, аллилуия.
Слава Отцу и Сыну и Святому Духу, и ныне и присно и во веки веков. Аминь.
Во Христа облекостеся, аллилуия.
Елицы во Христа крестистеся, во Христа облекостеся, аллилуия.
ЧТЕНИЕ СВЯЩЕННОГО ПИСАНИЯ
Прокимен воскресный, глас 3
Господь просвещение мое, и Спаситель мой, кого убоюся?
Господь защититель живота моего, от кого устрашуся?
Господь просвещение мое, и Спаситель мой, кого убоюся?
Господь просвещение мое, и Спаситель мой, кого убоюся?
Чтение апостольского послания
Послание святого апостола Павла ко Евреем (зачало 333 от полу; с 12 главы 28 стиха по 13 главу 8 стих).
Братие, царство непоколебимо приемлюще, да имамы благодать, eюже служим благоугодно Богу с благоговением и страхом, ибо Бог наш oгнь поядаяй eсть.
Братолюбие да пребывает. Страннолюбия не забывайте, тем бо не ведяще нецыи странноприяша ангелы. Поминайте юзники, аки с ними связани: озлобляeмыя, аки и сами суще в теле. Честна женитва во всех, и ложе нескверно: блудником же и прелюбодеeм судит Бог. Не сребролюбцы нравом, довольни сущими. Той бо рече: не имам тебе оставити, ниже имам от тебe отступити. Яко дерзающим нам глаголати: Господь мне помощник, и не убоюся, что сотворит мне человек?
Поминайте наставники ваша, иже глаголаша вам слово Божие, ихже взирающе на скончание жителства, подражайте вере их. Иисус Христос вчера и днесь, Тойже и во веки.
На русском языке.
Братья, принимая Царство непоколебимое, будем держаться благодати, и ею да служим благоугодно Богу с благоговением и страхом, потому что Бог наш есть также огонь поедающий.
Братолюбие да пребывает. Гостеприимства не забывайте, ибо чрез него некоторые, не зная, оказали гостеприимство ангелам. Вспоминайте об узниках, как бы с ними вместе заключенные, о страждущих, как бы и сами находящиеся в теле. Брак да будет честен во всем, и ложе непорочно; ибо блудников и прелюбодеев будет судить Бог. Имейте нрав несребролюбивый, довольствуясь тем, что есть; ибо Он Сам сказал: "Я тебя не оставлю и тебя не покину", так что мы смело говорим: "Господь мне помощник, и не убоюсь; что сделает мне человек?"
Помните начальников ваших, которые говорили вам слово Божие: взирая на исход их жизни, подражайте их вере. Иисус Христос вчера и сегодня и вовеки – Тот же.
Аллилуия, аллилуия, аллилуия.
Господь воцарися, в лепоту облечеся. Аллилуия, аллилуия, аллилуия.
Ибо утверди вселенную, яже не подвижится. Аллилуия, аллилуия, аллилуия.
Слава Тебе, Господи, слава Тебе.
Евангелие от Иоанна (Зачало 39, 11 глава, стихи с 1 по 45)
Во время оно, бе некто боля Лазарь от Вифании, от веси Мариины и Марфы сестры eя. Бе же Мария помазавшая Господа миром и отерши нозе Eго власы своими, eяже брат Лазарь боляше. Посласте убо сeстре к Нему, глаголюще: Господи, се, eгоже любиши, болит. Слышав же Иисус рече: сия болезнь несть к смерти, но о славе Божии, да прославится Сын Божий eя ради. Любляше же Иисус Марфу, и сестру eя, и Лазаря. Егда же услыша, яко болит, тогда пребысть на немже бе месте два дни. Потом же глагола учеником: идем во Иудею паки. Глаголаша Eму ученицы: Равви, ныне искаху Тебе камением побити Иудеe, и паки ли идеши тамо? Отвеща Иисус: не два ли надесяте часа eста во дне? Аще кто ходит во дне, не поткнется, яко свет мира сего видитъ: Аще кто ходит в нощи, поткнется, яко несть света в нем. Сия рече, и посем глагола им: Лазарь друг наш успе, но иду, да возбужу eго. Реша же ученицы Eго: Господи, аще успе, спасен будет. Рече же Иисус о смерти eго, oни же мнеша, яко о успении сна глаголет. Тогда рече им Иисус не обинуяся: Лазарь умре: И радуюся вас ради, да веруете, яко не бех тамо, но идем к нему. Рече же Фома, глаголемый Близнец, учеником: идем и мы, да умрем с Ним. Пришед же Иисус, обрете eго четыре дни уже имуща во гробе. Бе же Вифания близ Иерусалима яко стадий пятьнадесять, И мнози от Иудeй бяху пришли к Марфе и Марии, да утешат их о брате eю. Марфа же eгда услыша, яко Иисус грядет, срете Eго, Мария же дома седяше. Рече же Марфа ко Иисусу: Господи, аще бы зде был, не бы брат мой умерл. Но и ныне вем, яко eлика аще просиши от Бога, даст Тебе Бог. Глагола eй Иисус: воскреснет брат твой. Глагола Eму Марфа: вем, яко воскреснет в воскрешение, в последний день. Рече же eй Иисус: Аз eсмь воскрешение и живот, веруяй в Мя, аще и умрет, оживет. И всяк живый, и веруяй в Мя, не умрет во веки. Емлеши ли веру сему? Глагола Eму: eй, Господи, аз веровах, яко Ты eси Христос Сын Божий, иже в мир грядый. И сия рекши, иде и пригласи Марию сестру свою, тай, рекши: Учитель пришел eсть, и глашает тя. Oна же яко услыша, воста скоро, и иде к Нему. Не уже бо бе пришел Иисус в весь, но бе на месте, идеже срете Eго Марфа. Иудеe же убо сущии с нею в дому, и утешающе ю, видевше Марию, яко скоро воста и изыде, по ней идоша, глаголюще, яко идет на гроб, да плачет тамо. Мария же яко прииде, идеже бе Иисус, видевши Eго, паде Eму на ногу, глаголющи Eму: Господи, аще бы eси был зде, не бы умерл мой брат. Иисус же, яко виде ю плачущуся, и пришедшия с нею Иудeи плачуща, запрети духу, и возмутися Сам. И рече: где положисте eго? Глаголаша Eму: Господи, прииди и виждь. Прослезися Иисус. Глаголаху убо жидове: виждь, како любляше eго. Нецыи же от них реша: не можаше ли Сей, отверзый oчи слепому, сотворити, да и сей не умрет? Иисус же паки претя в Себе, прииде ко гробу. Бе же пещера, и камень лежаше на ней. Глагола Иисус: возьмите камень. Глагола Eму сестра умершаго Марфа: Господи, уже смердит, четверодневен бо eсть. Глагола eй Иисус: не рех ли ти, яко аще веруеши, узриши славу Божию? Взяша убо камень, идеже бе умерый лежа. Иисус же возвед oчи горе, и рече: Oтче, хвалу Тебе воздаю, яко услышал eси Мя. Аз же ведех, яко всегда Мя послушаеши, но народа ради стоящаго окрест рех, да веру имут, яко Ты Мя послал eси. И сия рек, гласом великим воззва: Лазаре, гряди вон. И изыде умерый, обязан рукама и ногама укроем, и лице eго убрусом обязано. Глагола им Иисус: разрешите eго, и оставите ити. Мнози убо от Иудeй пришедшии к Марии и видевше, яже сотвори Иисус, вероваша в Него.
На русском языке.
В то время был болен один человек, Лазарь из Вифании, из селения Марии и Марфы, сестры ее. Мария же была та, которая помазала Господа миром и отерла ноги Его волосами своими; ее брат Лазарь был болен. Послали сестры сказать Ему: Господи, вот тот, кого Ты любишь, болен. Услышав это, Иисус сказал: болезнь эта не к смерти, но во славу Божию, чтобы прославлен был Сын Божий чрез нее. Любил Иисус Марфу и сестру ее и Лазаря. А когда услышал, что Лазарь болен, тогда остался Он два дня на том месте, где был. Затем, после этого, Он говорит ученикам: идем снова в Иудею. Говорят Ему ученики: Равви, только что искали Иудеи побить Тебя камнями, и Ты снова идешь туда? Ответил Иисус: не двенадцать ли часов в дне? Кто ходит днем, не спотыкается, потому что видит свет мира сего. А кто ходит ночью, спотыкается, потому что нет света в нем. Сказал Он это, и говорит им потом: Лазарь, друг наш, уснул; но Я иду разбудить его. Сказали Ему ученики: Господи, если уснул, будет спасен. Но сказал Иисус о смерти его, а они подумали, что говорит Он о простом сне. Тогда и сказал им Иисус прямо: Лазарь умер. И Я радуюсь за вас, что Я не был там, дабы вы уверовали. Но идем к нему. Тогда Фома, называемый Близнец, сказал другим ученикам: идем и мы, чтобы умереть с Ним. Придя, Иисус нашел, что он уже четыре дня в гробнице. Была же Вифания близ Иерусалима, стадиях в пятнадцати. И многие из Иудеев пришли к Марфе и Марии утешить их в горе о брате. Марфа, когда услышала, что Иисус идет, вышла к Нему навстречу; Мария же сидела у себя в доме. Сказала тогда Марфа Иисусу: Господи, если бы Ты был здесь, не умер бы брат мой. Я и теперь знаю, что о чем бы Ты ни попросил Бога, даст Тебе Бог. Говорит ей Иисус: воскреснет брат твой. Говорит Ему Марфа: знаю, что воскреснет в воскресение, в последний день. Сказал ей Иисус: Я – воскресение и жизнь; верующий в Меня, если и умрет, оживет; и всякий живущий и верующий в Меня не умрет вовек. Веришь ли ты в это? Говорит она Ему: да, Господи, я уверовала и верую, что Ты – Христос, Сын Божий, грядущий в мир. И сказав это, она пошла и позвала Марию, сестру свою, сказав тайно: Учитель здесь и зовет тебя. Она же, когда услышала, встала поспешно и пошла к Нему. Еще не вошел Иисус в селение, но все еще был на том месте, где встретила Его Марфа. Тогда Иудеи, бывшие с ней в доме и утешавшие ее, увидев, как Мария поспешно встала и вышла, последовали за ней, думая, что она идет к гробнице, чтобы плакать там. А Мария, когда пришла туда, где был Иисус, увидев Его, пала к Его ногам и сказала Ему: Господи, если бы Ты был здесь, не умер бы мой брат. Иисус, когда увидел ее плачущую и пришедших с ней Иудеев плачущих, возмутился духом и пришел в волнение, и сказал где вы положили его? Говорят Ему: Господи, иди и посмотри. Прослезился Иисус. Говорили тогда Иудеи: вот, как Он любил его. А некоторые из них сказали: не мог ли Он, открывший глаза слепому, сделать, чтобы и этот не умер? Иисус, снова возмущаясь в Себе, приходит к гробнице: это была пещера, и камень закрывал ее. Говорит Иисус: возьмите камень. Говорит Ему сестра умершего, Марфа: Господи, уже смердит: ведь ему четвертый день. Говорит ей Иисус: не сказал ли Я тебе, что, если уверуешь, увидишь славу Божию? Тогда взяли камень. Иисус же поднял глаза ввысь и сказал: Отче, благодарю Тебя, что Ты услышал Меня. Я знал, что Ты всегда Меня слышишь, но сказал ради народа, стоящего кругом, чтобы они уверовали, что Ты Меня послал. И сказав это, воззвал громким голосом: Лазарь, выходи. И вышел умерший, связанный по рукам и ногам погребальными перевязями, и лицо его было обернуто платком. Говорит им Иисус: развяжите его и пустите его идти. Тогда многие из Иудеев, пришедшие к Марии и увидевшие, что Он сотворил, уверовали в Него.
Слава Тебе, Господи, слава Тебе.
Помяни нас, Господи, егда приидеши во Царствии Твоем.
Помяни нас, Владыко, егда приидеши во Царствии Твоем.
Помяни нас, Святый, егда приидеши во Царствии Твоем.
Лик небесный поет Тя, и глаголет: Свят, Свят, Свят Господь Саваоф, исполнь Небо и земля славы Твоея.
Приступите к Нему и просветитеся, и лица ваша не постыдятся.
Лик Небесный поет Тя, и глаголет: Свят, Свят, Свят Господь Саваоф, исполнь Небо и земля славы Твоея.
Сла́ва Отцу́ и Сы́ну и Свято́му Ду́ху. Лик святых Ангел и Архангел, со всеми Небесными силами поет Тя, и глаголет: Свят, Свят, Свят Господь Саваоф, исполнь Небо и земля славы Твоея,
И ны́не и при́сно и во ве́ки веко́в. Ами́нь. Верую во единаго Бога Отца Вседержителя, Творца Небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век. Света от Света, Бога истинна от Бога истинна, рожденна, не сотворенна, единосущна Отцу, Имже вся быша. Нас ради человек, и нашего ради спасения сшедшаго с Небес, и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребена. И воскресшаго в третий день по Писанием. И возшедшаго на Небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую Соборную и Апостольскую Церковь. Исповедую едино крещение, во оставление грехов. Чаю воскресения мертвых, и жизни будущаго века. Аминь.
Ослаби, остави, прости, Боже, прегрешения наша, вольная и невольная, яже в слове, и в деле, яже в ведении и не в ведении, яже во дни и в нощи, яже во уме и в помышлении: вся нам прости, яко Благ и Человеколюбец.
Отче наш, Иже еси на Небесех! Да святится имя Твое, да приидет Царствие Твое, да будет воля Твоя, яко на Небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Кондак, глас 2
Всех ра́дость Христо́с, И́стина, Свет, Живо́т и ми́ра Воскресе́ние, су́щим на земли́ яви́ся Свое́ю бла́гостию, и бысть о́браз Воскресе́ния, всем подая́ Боже́ственное оставле́ние.
Господи, помилуй (12 раз).
Всесвятая Троице, единосущная державо, нераздельное царство, всех благих вина, благоволи же и о мне грешнем, утверди, вразуми сердце мое, и всю мою отыми скверну. Просвети мою мысль, да выну славлю, пою и покланяюся, и глаголю: Един Свят, Един Господь, Иисус Христос, во славу Бога Отца. Аминь.
Буди имя Господне благословено отныне и до века (Трижды).
Слава Отцу и Сыну и Святому Духу, и ныне и присно и во веки веков. Аминь.
Псалом 33
Благословлю Господа на всякое время, выну хвала Его во устех моих. О Господе похвалится душа моя, да услышат кротцыи и возвеселятся. Возвеличите Господа со мною, и вознесем имя Его вкупе. Взысках Господа, и услыша мя, и от всех скорбей моих избави мя. Приступите к Нему и просветитеся, и лица ваша не постыдятся. Сей нищий воззва, и Господь услыша и, и от всех скорбей его спасе и. Ополчится Ангел Господень окрест боящихся Его, и избавит их. Вкусите и видите, яко благ Господь: блажен муж, иже уповает Нань. Бойтеся Господа, вси святии Его, яко несть лишения боящимся Его. Богатии обнищаша и взалкаша: взыскающии же Господа не лишатся всякаго блага. Приидите чада, послушайте мене, страху Господню научу вас. Кто есть человек хотяй живот, любяй дни видети благи? Удержи язык твой от зла, и устне твои, еже не глаголати льсти. Уклонися от зла и сотвори благо, взыщи мира и пожени и. Очи Господни на праведныя, и уши Его в молитву их. Лице же Господне на творящия злая, еже потребити от земли память их. Воззваша праведнии, и Господь услыша их, и от всех скорбей их избави их. Близ Господь сокрушенных сердцем, и смиренныя духом спасет. Многи скорби праведным, и от всех их избавит я Господь. Хранит Господь вся кости их, ни едина от них сокрушится. Смерть грешников люта, и ненавидящии праведнаго прегрешат. Избавит Господь души раб Своих, и не прегрешат вси уповающии на Него.
Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Слава Отцу и Сыну и Святому Духу, и ныне и присно и во веки веков. Аминь. Господи помилуй (Трижды). Господи, благослови.
Господи, Иисусе Христе Сыне Божий, молитвами Пречистыя Твоея Матери, святых, славных и всехвальных апостол, преподобных и богоносных отец наших, праведного Лазаря Четверодневного, епископа Китийского, и всех святых помилуй и спаси нас, яко благ и Человеколюбец. Аминь.
Конец и Богу слава
